“Baztandarrek propio sentituko duten hotela izatea nahi dugu” adierazi du Hilton hotel sareko estatuko arduraduna den Carlos Mirok prentsaurrekoan. Bere ondoan, Salvador Urbistondo, proiektua sustatu duen enpresaria zegoen. Luxua hitza erabiltzea ekidin duten arren, behin ta berriz “goi mailako” turistendako hotela izanen dela azpimarratu dute. “Baztan eta Nafarroa ezagutzeko toki aproposa izanen da Aroztegia” azpimarratu du Mirok, “Kalitatezko hotela, tokian tokiko gastronomia daztatzeko aukerarekin”.
Baztango herritarrak irabazi nahiean, bailaran duten oposizioa kontutan izanda, Aroztegia Jauregiko sustatzaileek sortuko dituzten enpleguak azpimarratu dituzte etengabe. 65-70 langile izanen ditu hotelak, eta Baztango biztanleei eman nahi diete lehentasuna.
Urtarrilean, hotelaren zehaztapen eta golf zein urbanizazio esparruaren gaineko zehaztasun gehiago emanen dituztela iragarri dute.