EAko sektore kritikoko buru Maiorga Ramirez parlamentari nafarra pozik agertu da Eba Blanco alderdiko idazkari nagusi izendatzea kautelaz bertan behera utzi dutelako, eta azaroaren 24an primarioak egingo dituztela berretsi du.
Gasteizko Lehen Auzialdiko 7 zenbakiko Epaitegiak Eba Blanco idazkari nagusi izendatzea kautelaz etetea erabaki du, sektore kritikoko lau kidek aurkeztutako demanda ebazten den bitartean; izan ere, Pello Urizarren oinordeko izateko irekitako primarioen prozesuan parte hartzeko eskubidea urratu izana salatu zuten.
Ramirezek ohar bidez adierazi duenez, ebazpen judizialak "EAren krisi demokratikoari irtenbide azkar bat ematea errazten du", "Eba Blancoren aldarrikapen bidegabea" ondoriorik gabe uzten duelako. Barne hauteskunde kanpaina "berehala" hastea eskatu du. Bi hautagaitzen arteko eztabaida bat egitea proposatu du; eta, ondoren, afiliatuek azaroaren 24an bozketa bitartez idazkari nagusia aukeratzea.
"Urrezko aukera baten aurrean gaude, hauteskunde prozesu gardena berehala martxan jartzeko, zalantzarik gabe ilusioa piztuko duena afiliazio guztiarentzat", gaineratu du.
