Espainian "aukera aurrerakoietatik eta aniztasuna aitortzeko jarreretatik egonkortasun akordioak" lor daitezela eskatu du Geroa Bairen Nafarroako Parlamentuko eledun Uxue Barkosek, Mahai eta Eledunen Batzarraren ondotik, "hemen, Nafarroan, egin den bezala, eta ildo horretan etorkizunerako lan bat egiteko bokazioarekin".
Barkosek Geroa Bairen emaitzak deitoratu ditu, izan ere, "emaitza txarrak izan dira, eta boto erabilgarria bereziki nabarmena izan da". Koalizioak ez du eserlekurik lortu, eta 12.000 bototan atzera egin du, 10.000 babesarekin geratzeraino.
Sanchezen Gobernua ahalbidetzeko PPren balizko abstentzioari buruz, berriz, adierazi du ezin duela PPren izenean hitz egin: "PPk esan beharko du hori ote den bere apustua, baina ez dirudi Pedro Sanchez buru dela izan daitekeenik, PPko presidenteari entzundakoaren arabera".