Negua udazken betean iritsi da, eta temperatura nabarmen jaitsi da Nafarroako herririk altuenetan. Gauean -3.5ºC-ko minimoak izan dira Zaraitzu ibarrean. 800 metrotik behera egin du elurra Nafarroako Pirinioetan eta baita Agoitzen ere (490/530 m).
Elurrak zenbait gorabehera eragin ditu goizean Nafarroako errepideetan. N-135 errepidean, Erroko mendatean, auto bat errepidetik atera da. Kateak nahitaez erabili behar dira Garde eta Anso arteko Matamachos mendatean (NA-176), Laza mendatean (NA-140) eta Isaban (NA-137), 33. kilometrotik aurrera. Itxita dago, bestalde, NA-2011 errepidea, Abodiko eski estaziotik aurrera. Aezkoako bailaran argi mozketak izan dituzte.
Azken orduetan, euriteek Luzaide, Orreaga eta Bera herrietan eragin dute batez ere, 24,8, 22 eta 20.2 L/m2-ko metaketekin.