"Demokraziaren eta Konstituzioaren defentsan" Societat Civil Catalanak (SCC) Bartzelonan deitu duen manifestazioan parte hartuko du UPNk igandean, urriaren 27arekin.
Gogoratzekoa da SCCk antolaturiko aurreo manifestazioetan eskuin muturreko miitanteek parte hartu izan dutela, hainbat hedabidek salatu dutenez.
Ohar batean, erregionalistek gaitzetsi egin dituzte Auzitegi Gorenaren epaia ezagutu zenetik Katalunian izandako indarkeriazko ekintzak, eta, aldi berean, Estatuko Segurtasun Indarrei babesa agertu diete, eta zaurituak "lehenbailehen" sendatzea opa diete.
UPNren ustez, "frogatuta geratu da independentismoak eta nazionalismoak elkarbizitzaren hausturaren sinonimo direla, eta ikuspegi guztietatik pobretzen dituztela gizarteak". Halaber, "indar konstituzionalista guztien batasuna" eskatu du, "Espainia hautsi nahi duten alderdiei aurre egiteko".
Azkenik, erregionalistek igandeko manifestazioan parte hartzera deitu dute gizarte zibila. "Gehiengo handi bat gara Katalunian gertatzen ari dena partekatzen ez dugunak eta bizikidetzaren eta zuzenbide estatuaren alde egiten dugunak. Demokraziaren oinarria legea errespetatzea da, eta inor ez dago horren gainetik ", ondorioztatu dute.
