Eusko Alkartasunako lerro ofizialeko eta ildo alternatiboko kideen arteko tirabirak ez du etenik. Idazkari orokor izateko lehiatik apartatu duten Maiorga Ramirezek, sektore ofizialaren jarrera salatu du alderdiko Berme Batzordea manipulatzen ari direlako. Komunikatu batean azaldu duenez, Eba Blanco, hautagai ofizialak, 2017ko EAren nazio Kongresuan hautaturiko Berme Batzordeko bi kide baztertu ditu. Hain zuzen, Ramirezek, batzorde honengana jo du bere hautagaitza onartuta izan ez dela salatzeko.
Diziplina espedienteak eta “afiliazioarentzat eta herriarentzat erreferente politiko bat den” Garaikotxea lehendakaria, isilpean mantentzeko gonbidapenak salatu ditu Maiorga Ramirezek, baita afiliazioaren eskubideak defendatzeagatik, kongresu nazionalean eta lurralde batzarretan hautatutako organoak jazartzea eta eraistea ere. “Blancok eta sektore ofizialak, neurri errepresiboekin eta mehatxuekin isilarazi nahi dute Eusko Alkartasuna EH Bildun desegiteko eta alderdi gisa desagertzeko ildo estrategikoarekin bat egiten ez duen oro" adierazi du Ramirezek.
Egoera horren aurrean, Maiorga Ramirezen hautagaitzak "zuhurtziaz jokatzeko eta afiliazioari Idazkaritza Nagusiko kargua eta alderdiaren etorkizuna bete behar dituen pertsona aukeratzea dagokiola aitortzeko" deia egin du.
