Elkarretaratzearen ostean, Kontseiluko Paul Bilbaok, ELA sindikatuko Imanol Pascualek eta LAB sindikatuko Imanol Karrerak hartu zuten hitza. Bilbaok ausardia eskatu zion behin ta berriz Maria Chiviteren Gobernuari, epaiak sortutako egoerari aurre egiteko. “Uneotan soilik bi bide ditu Gobernuak, bereizkerian eta gehiegikerian oinarritutako iraganeko politiketara itzultzea, edo benetan berdintasuna, kohesioa eta justizia ardatz izango dituen politika bat abiatzea”.
UGT sindikatuaren jarrera salatu zuten Pascualek eta Karrerak, “Paradoxikoa da teorian eskubideak zaintzeko egon behar lukeen erakunde batek hizkuntz eskubideak bermatzeko neurrien kontra egitea”, adierazi zuten. Hiru bozeramaleek, berehalako neurri bezala, epaiaren kontrako helegitea aurkeztea eskatu zioten Gobernuari.
