Nafarroako gobernua osatzeko negoziazioak uste baino gehiago luzatuko dira. Eguerdian ziren elkartzekoak PSN, Geroa Bai, Ezkerra eta Ahal Dugu. PSNren eskariz atzeratu egin dute, baina, bilera. PSNk gobernu egiturari buruzko lanerako dokumentu bat aurkeztu zien gainerako taldeei asteartean, eta proposamen hori aztertzeko zuten bilera. Ez dute azalpen gehiago eman.
Atzo, Ahal Dugu-ren Koordinazio Kontseiluak aho batez erabaki zuen Nafarroan koalizio gobernu bat eratzea "ezinbestekoa" dela. PSN, Geroa Bai, Ezkerra eta Ahal Dugu-ren kontseilariek osatutako gobernua galdegin du alderdi moreak.
Kolore bakarreko gobernua nahi du, ordea, PSNk. “Sozialisten gobernu bat nahi dugu” adierazi du PSNko antolakuntza idazkariak.
Aurreakordioa aurkeztu zuenean azaldu zuen, bestalde, Geroa Baik gobernuan egon nahi duela. "Ardura partekatuen gobernua nahi dugu”, adierazi du Geroa Baiko Itziar Gomezek; “gobernu bat non Geroa Bai presente dagoen”.Izquierda-Ezkerrak ez du egitura jakin baten alde egin.
