Sektoreka bilerak egin dituzte astelehenetik PSNk, Geroa Baik, Ahal Dugu-k eta Ezkerrak, Nafarroako Gobernurako programa akordio bat adostu eta Maria Txibite PSNko lehendakarigaiaren inbestidura ahalbidetzeko. Gaur goizean berriro bildu dira, desadostasunak nola kudeatu zehaztu eta autogobernuaz hitz egiteko.
Bilera amaituta, prentsaurrera irten dira Txibite, Uxue Barkos (Geroa Bai), Eduardo Santos (Ahal Dugu) eta Marisa de Simon (Ezkerra). 70 orrialde inguru dituen akordio programatikoa itxi dutela adierazi dute. Arratsaldean aurreratuko dituzte akordioaren edukiak.
Lau alderdiek 23 parlamentari dituzte Nafarroako Parlamentuan; beraz, inbestidura saiorako, beharrezkoa dute EH Bilduko zazpi parlamentarien babesa edo abstentzioa.
