Bigarren bilera erronda hasi da parlamentuan. Alderdi sozialistak gobernu aurrerakoia osatu nahi duen gainerako alderdiekin egin zuen bilkura atzo: Geroa Bairekin, Ahal Dugurekin eta Ezkerrarekin. Mahai gainean datozen lau urteetarako gobernu akordioa izan litekeenaren zirriborroa jarri zuen PSNk. Gainerako hiru alderdiek batzarraren ondotik nabarmendu zuten azken legealdian izan duten bide orriaren oinarrietako asko jaso dituela zirriborroan eta hortaz "baikor" azaldu ziren guztiak. Ostegunean beste hitzordu bat izanen dute sakontzeko agirian eta aurrera begirako pausoak finkatzeko.
Bileran ez zena izan, alderdi sozialistak betoa jarria diolako, EH Bildu izan zen. Bere botoak eta babesa beharrezkoak izanen direla nabarmendu zuten bileraren ostean bereziki Geroa Baik eta Ezkerrak.
