27.105 langile publiko daude deituak hauteskunde sindikaletara. Gaur izanen da horretarako aukera 7:00etatik 23:00etara. Administrazioko 14 erakundetako 264 ordezkari aukeratu beharko dituzte eta guztira 3.711 dira hautagaiak: LAB sindikatuak 724 hautagai ditu; ELAk 500, CCOOk 480, UGTk 437 eta AFAPNAk 419. Horiek dira ordezkari sindikal nagusiak baina bestelakoak ere izanen dira gaurko bozketa horretan: ANPE, STEILAS, APS, CSIF, USAE, SATSE, USAE, SMN, STAJ eta USO.
Gaur ez da dena erabakiko
Administrazioko arlo guztietan ez dira gaur izanen hauteskunde sindikal horiek. Ekainaren 10ean izanen dute horretarako aukera foruzainek, adibidez. Guztira 1.070 hautesle izanen dira deituak eta 23 ordezkari hautatuko dituzte. Era berean, Osasunbidean ere beranduago izanen da hautaketa hori: heldu den urterako utziko dituzte. Osasun arlo horretan hauteskundeak pasa den 2016ko uztailaren 1ean izan zituzten.
2015-2016ko emaitzak
2015eko maiatzaren 20an egin zituzten azken hauteskunde nagusiak administrazio publikoan. LABek eskuratu zuen gehiengoa 74 ordezkari erdietsita, ELA izan zen bigarren indarra 44rekin, CCOO gero 41ekin, AFAPNA 26rekin, eta UGT zein SMN 19rekin. Beste hamaika erakundek ere eskuratu zituzten ordezkariak: SATSEk 11, ANPEk, CSIFek eta STEILASek 10, SPA 9, APF 8, USAE 6, STAJ 4, APS eta USO 3 eta ESKk 2.