Disuasio-neurriak areagotu eginen ditu Nafarroako Gobernuak ikusirik Claverina hartzak segitzen duela ardiak hiltzen. Asteburuan bi gehiagoren heriotza konfirmatu dute. Erronkarin izaten ari dira batez ere erasoak, Uztarrotzetik gertu. Hartza Pirinioan dagoen bitartean jarraitu beharreko protokoloaren jarraimendua eginen dute eta prebentzioan jarriko dute arreta berezia: eraso gehiago gerta ez daitezen neurriak hartuko dituzte. Hartzaren ohiturak aldatzea bilatuko dute: bere elikagaiak artaldeetatik kanpo aurkitu ditzan nahi dute.
Joan den udazkenean askatu zuten Claverina hartza Pirinioan. Eslobeniatik ekarri zuten Frantziako Piriniora espeziea gal ez dadin inguru horretan. Nafarroan ikusi dute maiz eta artaldeetan zenbait heriotza eragin ditu. Geolokalizatzaileak ezartzen ari dira hartzaren mugimenduen berri lehenago,argiago eta hobeago jaso ahal izateko. Hartzak erasorik egin ez ditzan bilatzen ari dira baina halakorik susmatu ezkero telefono kontaktu bat ere jarri dute herritarren eskura: 699 30 76 98.