Nafarroako Gobernua Erronkariko bailaretako abereen larreetatik Claverina hartza arrea urruntzeko helburuz neurriak ezartzeko operatiboa ezartzen ari da, Pirinioetako hartzaren lan taldeak eta Estatuko Naturgune eta Biodibertsitate Komisioak onartutako "Pirinioetan hartzen interbentzioaren protokoloak" zehaztutakoari jarraiki. Hala, inguruan lan egiten duen Ingurumen Basozainen taldea indartuko da.
Bart ardi bat hil zuen hartzak Uztarrozen. Zazpi eraso gertatu dira Erronkarin, lau azaroan eta gainerakoa azken astean. Guztira zortzi ardi hil dira. Artzatza eta hartza bateragarri egitea da gobernuaren helburua.
Sortita eta Claverina hartzek duten lepokoak ez du unean uneko informaziorik igortzen, eta ordu batzuetara jasotzen dute hartzen kokapenaren berri. Hartzak Nafarroan daudela jakin eta berehala inguruko abeltzain eta agintariei jakinarazten die Nafarroako Gobernuak. Gainera, adierazi dutenez, Pirinioetan bazkatzen diren artaldeei 18 geolokalizatzaile ezarri die gobernuak - 34 ezartzeko asmoa du-, horien mugimenduen berri izateko.