Euskal Herriko mugimendu feministako ordezkariek Martxoaren 8ko greba feministaren balorazioa egin dute gaur Donostian. "Eraldaketarako eragile nahiz subjektu anitzak batu gara: talde feministak, etxeko langileen elkarteak, sindikatuak, emakume* migranteen taldeak, baserritarrak, ikasle eta gazte taldeak... Elkarrekin ahaldundu eta politizatu gara, eta hori da gure garaipen nagusia".
Grebak jarraipen "masiboa" izan zuela adierazi dute. Hala ere, hori ez da nahikoa: "Urrats handia eman dugu baina urrun gaude gure helburuetatik". Emakumeek doan egiten dituzten lanak sozilizatzeko, grebak azaleratzen dituen gatazketan sakontzen jarraituko dute. "M8 honetan, oraindik ere, emakume* langile askok ezin izan genuen gure greba eskubidea gauzatu, egoera zaurgarrienetan egoteagatik". Bost ardatzetan egituratu dute greba feminista, eta alor bakoitza aztertu dute: zaintza, kontsumoa, pentsionistak, ikasleak eta soldatapeko lana.
Salatu dutenez, greba feministan zehar Euskal Herrian 60 emakume identifikatu zituzten.
