Asteburu mugitua izan dute Oronozko suhiltzaileek. Sute txiki asko piztu ziren larunbatean Donamarian, Arraiotz, Abartan eta Ekaitza mendietan, Erratzun eta Iruritan. Igandean aldiz, sutea handiagoa izan zen Berroeta eta Almandoz artean. Oronoz eta Iruñeko suhiltzaileak egon dira bertan lanean goizeko 5.45ak arte. Hego haizeak gogor jo du asteburuan eta horrek zaildu egin ditu sua itzaltzeko lanak. 47hektarea baso izan dira kaltetuak, gehienak haritzak eta gaztainondoak.
Ez da izan asteburuko sute bakarra, igandean ere Bargotan "La Inera" parajean, 13hektarea erre egin ziren. Hiru fronte izan zituen suteak eta Lizarra eta Lodosako suhiltzaileez gain, Nafarrgoako Gobernuko helikopteroa ere aritu ziren lanean itzaltzeko. Neguko kimaketa lanen ostean sortutako sua izan zela uste du Foruzaingoak.
Nafarroako suhiltzaileek gogoratu dute egun hauetan debekatua dagoela neguan ohikoak diren larreetako su kontrolatuak egitea. Hego haizea egonik arriskutsua da eta erraz zabal baitaiteke sua.
