Gaur lehen lanuztea dute medikuek gehiengoa duen Sindikatu Medikuak deituta. Otsailaren 7, 14, 21 eta 28an ere eginen dituzte protestak. Euren aldarrikapenak hiru dira bereziki: gaixoekin harreman egokia izateko beharrezkoa dutela denbora-tarte gehiago horietako bakoitzarekin; lan baldintzak duintzea eta soldatak igotzea; eta, euskara lanpostu publikoetarako baldintza izan ez dadila.
Lab sindikatuak du ordezkari gehien mahai sektorialean eta ez du bat egin greba deialdiarekin "interes partikular" gehiegi sumatu dituelako. Euskararen aurkako jarrera ere ikusi dute deitzaileen artean eta Lab-ek ez du horrekin bat egiten. Nafarroako Osasungoa Euskalduntzeko Erakundeak ere kritiko jokatu du deialdiaren aurrean: euskara zokoratu nahian dabiltzala uste du eta bat egin ezin daitekeela dio.