Podemos-Ahal Duguko hiru parlamentari kaleratzeko Orain Bairen eskaera argitzeko txosten juridikoa eskatu zuen mahaiak joan den astelehenean, eta ez zion bide eman eskaerari. Horren aurrean, eledunen batzordean, erabaki horren aurkako helegitea aurkeztu zuen UPNk. Kaleratuen artean Ainhoa Aznarez ere badagoenez, UPNk uste du astelehenetik automatikoki parlamentuko lehendakari izateari utzi beharko liokeela, eta, ondorioz, geroztik hark deitutako osoko bilkurak "baliogabeak" direla. Dena dela, parlamentuko zerbitzu juridikoek ondorioztatu dute Aznarezek "normal" jardun dezakeela lehendakari, bere egoera argitu bitartean. Zerbitzu juridikoek aipatzen dute Ahal Duguko Mikel Builek, Ainhoa Aznarezek eta Tere Saezek idatzi bat aurkeztu dutela kaleratzearen aurka eta, aitzitik, atxiki gabeko parlamentari izendatu beharko liratekeela Carlos Couso, Laura Perez, Fanny Carrillo eta Ruben Velasco. Horren aurrean, mahaiak txosten juridikoa eskatu du, eta, hortaz, bere karguari dagozkion zereginak egin ditzake.
UPNk helegitearen bidez presioa sartu nahi izan du, kaleratzea azkartzeko. Zerbitzu juridikoen lehen iritzi horrek lasaitasuna eman ahalko dio mahaiari. UPNk eta PPk, gainera, eskatu dute Aznarezek ez lukeela bozkatu beharko erabaki horietan, eragiten diotelako. Cousoren kasuan, ez dute halakorik eskatu.
Egunotako jarduna linbo juridiko batean geratu da Nafarroako Parlamentuan. Mahai eta Eledunen batzarrean erabakiko dute zer gertatzen den Ahal Duguko parlamentariekin.
EUSKALERRIA IRRATIAzale hori:
FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.
Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.
Izan ere, zenbat eta komunitate handiagoa, orduan eta proiektu komunikatibo eraginkorragoa.
Bazkidetu zaitez!