Sugi du izena eta Silvia Gonzalezen txakurra da. Ez da edozein txakur gainera: Silviak sorospena beharko balu txakurrak jakinen luke erantzuten. Indarkeria matxista jasandako emakumea da Silvia. Haren bikotekidea espetxean da orain baina urtarrilean utziko dute aske. Beldurrarekin bizi da. Eta laguntza handia eman dio Sugi txakurrak. Harekin doa 24 orduz. Baina trabak izaten ditu. Leku askotan ez diote txakurrarekin sartzen uzten, eta hartara, ez sartzea erabakitzen du Silviak. Txakurrarekin sentitzen da salbu, harik gabe, ez.
Parlamentuan 125.000 sinadura erregistratu ditu bere txakurrari sorospen-txakur izendapena eman diezaioten. Modu horretan leku publikoetan arazorik gabe sarbidea izanen luke txakurrak. Babes neurria da txakurra Silviarentzat eta legez hori ziurtatzea eskatzen ari da. Ez bakarrik berarentzat baizik eta indarkeria matxista jasaten ari diren beste emakumeentzat ere.
Legea aldatu dezatela eta sorospen-txakur gisara har ditzatela emakumeei babesa ematen dieten txakur horiek, horixe eskatu du Silvia Gonzalezek.