Aldaketan sakontzeko asmoarekin udal hautagaitzak aurkeztu ditu EH Bilduk

Euskalerria Irratia 2018ko aza. 7a, 09:16

Nafarroako 13 hiri eta herri haundietako hautagaitzak aurkeztu ditu EH Bilduk datorren urteko udal hauteskundeetara begira. Jarraikortasuna da nagusi. Hautagai gehienak egun alkate edo zinegotzi dira. “2015ean ekindako aldaketaren bidea jarraitu nahi dugu” adierazi du Bakartxo Ruizek.

Jadanik ezaguna zen Iruñeko hautagaia izanen den Joseba Asironen izenaz gain, EH Bilduk beste 12 alkategaien izenak ezagutzera eman ditu. Oihaneder Indakoetxea (Barañain), Berta Arizkun (Burlata), Jose Angel Saiz (Zizur Nagusia), Koldo Leoz (Lizarra), Ander Oroz (Antsoain), Mikel Oteiza (Atarrabia), Raul Maiza (Berriozar), Joseba Otondo (Baztan), Aitor Elexpuru (Bera), Mikel Zabaleta (Leitza)  eta Aitor Larraza (Irurtzun) zerrendaren lehendabiziko postuan  errepikatuko dute. Egindako lana balorean jarrita, ekindako proiektuari jarraipena ematea dute helburu hautagaitza hauek.

Eguesibarren izen berria proposatzen du EH Bilduk, Ainara Gonzalez izanen da zerrendaburu 2019ko maiatzeko hauteskundeetan. Datozen asteotan, herriz herri egiten ari diren eztabaida eta barne hautaketa prozesuak bukatuta hurrengo hautagaiak aurkezten joanen da EH Bildu.

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!