Atzo zabaldu zituzten, bost hilabetez itxita egon ongoren, Almandoz eta Belateko tunelak. Sare transeuropearrean 500 metrotik gorako tunel guztiek bete behar duten Europako segurtasun-araudira egokitzeko tunel barruko obrak egin dituzte azken bost hilabeteetan. Aurreikusitakoa baino bi hilabete lehenago zabaldu dituzte N-121-A errepideko tunelak.
Autoak Belateko mendatera bideratu dituzte obrak iraun bitartean, baina ibilgailu astunak mugatua izan dute bide hori: matrikula bikoitiek eta bakoitiek astekako txandetan erabili ahal izan dute. Gainerako ibilgailu astunak A-15 autobidera eraman dituzte, eta kamioilarientzat bidesaria pagatzeko beherapenak jarri dituzte. Nafarroako Gobernuak atzo utzi zituen bertan behera laguntza horiek.
Hobekuntza lanak
Hauek dira bi tuneletan burutu diren lanak: likido toxikoak eta sukoiak ebakuatzeko drainatze-sistema bana ezarri dira; bide-zoruaren drainatzea zabaldu eta birjartzea; bide-zoru berria fresatzea eta birjartzea (MBC) eta seinaleak; aireztatze, argiztatze iraunkor eta gida-zirkuituetarako suaren kontrako kable-sare berria jartzea. Belateko tunelean, bestalde, 40 metro luzerako eta 3 metro zabalerako bi bazterbideak amaituta daude, hego tunel-ahoaren 360 eta 400 metrora hurrenez hurren. Bai Almandozko tunelean bai Belatekoan isuriak jasotzeko bi kutxatila eta sareta jarri dituzte.
Nafarroako Gobernuak 3,92 milioi euroko inbertsioa egin du egokitze-lan hauek aurrera eramateko. Construcciones Mariezcurrena enpresak ekainaren 4an hasi zituen obrak. Orduan itxi zituzten tunelak.