Egun historikoa, Labrit pilotalekuan: lehenbiziko aldiz sanferminetan emakumeen pilota partida izan da, Emakume Master Cup lehiaketako finala. Maite Ruiz de Larramendik (Eulate, Nafarroa), eta Olatz Arrizabalagak (Gernika, Bizkaia) jantzi zuten txapela, larunbatean, Naroa Iturainen (Iruñea, Nafarroa) eta Miren Larrarte (Bidania, Gipuzkoa) kontra (22-12).
Hirugarren postuan, Arrate Bergara eta Naroa Elizalde; laugarrenean, Andrea Aldaregia eta Maite Tolosa.
900 ikusleren aurrean
900 ikusle bildu ziren Labriten, eta "giro ona" nabarmendu zuten kirolariek, Labriten bildutako jendetzak egindako harrera eta frontoiaren "erreferentzialtasuna". Txapelketaren aurretik Euskalerria Irratian hitz egin zuen Naroa Iturainek, eta Iruñean sanferminetan jokatzeak egiten zion ilusioa azpimarratu zuen, festetan jokatzea "aukera polita" dela.
Sanferminetan, Labrit leporaino beteta
Labriteko partidek sanferminetan izandako arrakastaren beste adibide bat da izan da Emakume Master Cup; egunero betea egon da frontoia: bederatzi saio izan dira sanferminetako zortzi egunetan eta denak bete dira, ia 10.000 lagun batu ditu frontoiak.