Iruñerriko euskaldunon agerkaria
euskalerriairratia.eus

'Sanfermintza' saioa, egunero, Herri Sanferminen gunetik

Euskalerria Irratia 2018-07-10 09:31   kultura  Nafarroa

Elkarrizketak, musika, emanaldiak, gure kolaboratzaileen solasaldiak eta sorpresa mordoa izanen dugu, uztailaren 6tik 13ra, 12:00etatik 14:00etara, O plazatik, zuzen zuzenean, Xaloarekin elkarlanean.

'Sanfermintza' saioa, egunero, Herri Sanferminen gunetik
Argazkia: Juan Kruz Lakasta kazetaria, Sagrario Aleman euskaltzalea, Lohitzune Zuloaga soziologoa eta Saioa Alkaiza kazetaria. | Ikusi handiago | Argazki originala

Herri sanferminen gunetik, O plazatik,  Sanfermintza saioa eskaintzen ari gara, hirugarren urtez, bestaren unean uneko errealitatearen berri emateko; dena, zuzen zuzenean. Elkarrizketak, musika, emanaldiak, gure kolaboratzaileen solasaldiak eta sorpresa mordoa izanen dugu, uztailaren 6tik 13ra, 12:00etatik 14:00etara.

Bermutaren orduan, bertara joanda, irratsaioa ikusi eta entzuteko aukera paregabea izanen da, baina, ez hori bakarrik: bertaratzeko aukera izan ezean, www.euskalerriairratia.eus webgunean eta FMko 98.3 dialean ere izanen gaituzue. Kaleak, uhinak eta sarea hartuko ditugu, eta hori guztia Xaloa telebistarekin elkarlanean, beraz, bertan ere programa oso-osorik jarraitzeko aukera dago.

Sona handiko musikariak, entzierroko korrikalariak, peñetako kideak, herri mugimenduetako partaideak, bat-batekotasunean maisu diren bertsolariak, zaildutako kirolariak, Nafarroako Gobernuko eta Iruñeko Udaleko ordezkariak… Hitz batean: sanferminzaleak. Bestaren aurpegi guztiak bilduko ditugu oholtza gainean, irratiko kazetarien gidaritzapean, Juan Kruz Lakasta, Pello Argiñarena, Txari Eleta eta Saioa Alkaiza izanen baitira emanaldia bideratuko dutenak.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa