Legealdia amaitu aurretik, Emakumeen Etxea sortu dezan exijitu dio Iruñeko Emakumeen Etxearen batzarrak udalari, izan ere, III. Berdintasun planean aurreikusita dago egitasmoa sortzea, baita laukoaren akordio programatikoan ere; sortu ezean, "gizarte erdiari bizkarra emanen lioke udalak", Nerea Perez batzarraren bozeramaileak irakurritako testuaren arabera.
Udalak 2018ko Inbertsio Finantziero Sostengarrien aurrekontuaren %8'2a proiektura bideratu dezan nahi dute, hau da, 500.000 euro. Diru horrekin, autobus geltoki zaharrean 350 metro koadroko espazioa egokitu nahi dute, goiko eta beheko solairuan.
Emakumeen sinergiak oinarri
70 emakumek eta 30 kolektibok osaturiko batzarrak sei hilabete daramatza Emakumearen Etxearen parte hartze prozesuan. "Emakumeen artean behar diren sinergiak sortuko dituen eta hiriko emakume guztien ahalduntzea, ikuspegi feminista batetik, bultzatuko duen proiektu baten prestakuntzan gabiltza", esan dute.
Hiriarentzako "beharrezko proiektua" delakoan daude, "aldaketa une historikoan" baikaude, "edozein eratako indarkeria amaitzeko borrokan eta hiri feminista lortzeko eraldaketa sakonean", eta horren adibidetzat jo dute martxoaren 8ko greba feminista.
Ekintzen eskean
"Hitzetatik ekintzetara" pasatzeko ordua dela diote, eta konpromisoa eskatu diote udalean ordezkaritza duten alderdi politiok guztiei, baliabideak jar ditzaten, emakumeen etxea eraikitzeko.
