Alderdi popularraren aurrekontuak sostengatu ditu UPNk eta, hala, 80 milioi euroko saila erdietsi du Volkswagenentzat. LAB sindikatua, baina, kritiko azaldu da, Volkswagen Nafarroako eskuinaren eskakizunaren aurrean makurtu dela baiteritzo. Dirua "diskriminatzen duen enpresa batera" joanen dela gaitzetsi du Imanol Karrera Nafarroako LABeko bozeramaileak.
"Volkswagen Nafarroako eskuinaren eskakizunaren aurrean makurtu da, oxigeno baloia emanez, alderdi erregionalistaren ordurik apalenean", salatu du Karrerak, eta adierazi du enpresak "kontrataze sistema ustela eta iluna" daukala, "betikoek kontrolatuari eusteko" egin ohi dena. Horren adibide, emakumeen presentzia: %13'72 baino ez dira. "Genero bazterkeriaren aurkako politika aktiboei ekitea ukatzen duen enpresa batek nolatan jaso nahi ditu diru laguntza publikoak?", galdera airean utzi dute. Halaber, zuzendaritzaren onespenez, enpresaren hitzarmen kolektiboa "manipulatu" da, LABen hitzetan.
Dirua aurreztu nahian
Bestalde, batez besteko adina 44'58 urtekoa da enpresan, "ez da plantilla zaharkitua". Orain langileak gaztetzen saiatzen ari dira eta, LABen irudikoz, dirua aurrezteko estrategia da hori: "Gaur egun Volkswagenen sartzen diren langileek iraganean Sartzeko Mailakoek kobratzen zutena baino %75 gutxiago kobratzen dutela. Multinazionalaren asmoa eskulan garestia eta osasun txarrekoa deuseztatzea da, eskulan gazteez, osasuntsuez eta oso merkeez ordezkatuz".
Era berean, salatu dute Volskvagenek ez duela “inolako laguntza publikorik behar langileen borondatezko bajei laguntzeko”.
Laguntza nominalei ez
"Laguntza hauek ez daitezke nominalak izan; industria-ehun guztiarentzat izan behar dute, eta hauetan betekizun jakin batzuk bete behar dira haien hautua egiteko", azaldu du LABek.
