Foruzaingoak zazpi pertsona atxilotu ditu azken egunotan (sei gizon eta emakume bat) Cascanten, Lizarran, Olaztin, Sarrigurenen, Zizurren, Villafrancan eta Allon, indarkeria matxista edo familiartekoa leporatuta.
Nafarroako Gobernuaren esanetan, Tuterako segurtasun agenteek 56 urteko gizonezko bat atxilotu dute, familiartean indarkeria delitua egiteagatik. Salaketa jarri dute haren aurka.
Horrez gain, 47 urteko gizon bat atxilotu dute Tuterako Merindadeko herri batean, bikotekideari jotzeagatik. Olaztin, bestalde, 23 urteko gizon bat hartu dute atxilo, emakume bati umeen eta lekukoen aurrean eraso egiteagatik.
Gainera, Foruzaingoak beste lau pertsona atxilotu ditu, biktimengana hurbiltzea debekatzen zien agindu judizialak urratzeagatik.
Azkenik, bikotekide ohiarengana gerturatzeko debekua duen 43 urteko gizon bat atxilotu dute Lizarran. Aurrekariak ditu antzeko delituengatik.
Zazpi atxiloketa horiek kontuan izanik, dagoeneko 126 pertsona hartu ditu atxilo aurten Foruzaingoak, genero indarkeriarekin eta familiartekoarekin zerikusia duten delituengatik. Gehienetan emakumeak izan dira biktimak.
