Nafarroak pentsioak kudeatzeko eskumena izan dezan exijitu dute Geroa Baik eta EH Bilduk, asteburuko manifestazio jendetsuen ostean.
Nafarroak kudeaketaz badakiela azpimarratu du Koldo Martinez Geroa Baiko parlamentariak eta horren adibidetzat hartu du erreforma fiskala, haren ustetan, "elkartasun fiskala" ere badena. Hala, Nafarroak pentsioak osatzeko egindako urratsak hartu ditu hizpide. Testuinguru honetan, aldarri argia: Nafarroak pentsioak kudeatzeko eskumena izan dezala."Nafarroako pentsionistak hobeki leudeke, eskumena bagenu", esan du Koldo Martinezek.
0'25eko igoera "onartezina" da EH Bilduren aburuz. Horregatik, burujabetzaren alde egin du koalizioak. "Nafarroa gai izan da hezkuntza, osasun eta ogasun sistema kudeatzeko, zergatik ez da gai izanen pentsioak kudeatzeko?". Galdera airean utzi du parlamentariak.
Laukoa osatzen dutenen gainontzekoek ere mobilizazioak izan dituzte hizpide. Ahal Duguk adierazi du "pentsioak igotzearen kontra" egon direnak ere manifestazioan izan zirela, UPNri erreferentzia eginez, eta hori jarrera aldaketa baten seinale izan daitekeela; baina, nolanahi ere, "deigarria" dela. Ezkerrak ere mobilizazioak laudatu ditu eta "bai PSOEren baita PPren erreformak" berraztertu behar direla.
PP ez beste denak, mobilizazioekin
Oposizioko aldedien artean, gehiengoak pentsaio altuagoen aldeko aldarria babestu du. PSNk pentsioak Kontsumo Prezio Indizearen arabera igo beharko liratekeela aipatu du. Maria Chiviteren (PSN) aburuz, igoera "xuhur" hori ezin da baimendu.
UPNk, aldiz, esan du "zenbait neurri" krisi ekonomiaren garaian hartutakoak direla, baina "hazkunde ekonomikoa agerikoa" dela, eta, beraz, pentsioei buruz ere solas egiteko unea dela.
PPri dagokionez, ez ditu mobilizazioak goraipatu, baina “errespetua” eskatu du kalera atera ziren horientzat, eta Espainiako Gobernu Zentrala pentsioen igoera posible ote litzatekeen aztertzen ari dela esan.
