"Lana sexuaren arabera banatuta egoteak gure gain indarkeria mota desberdinak ekarri ditu, zaintza lanen banaketa dela eta. Indarkeria ekonomikoa: autonomia ekonomiko falta, zaintza lan prekarioak (bizitzarako ezinbesteko direnak). Gu gabe -guk planto eginda, gu geldituta- sistemak futzionatzeari uzten diola erakutsi nahi dugu. Horregatik da emakumeon* greba", azaldu dute grebaren antolatzaileek.
Greba "inklusiboa, transbertsala eta anitza" izatea desio dute, eta, ondorioz, asanblada bidez antolatzen ari dira: "Espazio hauek aberatsak eta kolektiboak izan dira. Bertan, koordinazioko informazioa landu dugu, greba edukiz nola jantzi eztabaidatu dugu eta lantalde desberdinak osatu ditugu -ekintzak, koordinazioa, finantzazioa...- eta martxoaren 8az pentsatu dugu; asko izan gara taldeetan parte hartzen hasi garenak".
Hala, lau ardatzetan banatu dute: kontsumo greba, lan greba, zaintza greba eta ikasle greba.