1978ko sanferminetako "triskantza" herriaren memorian geratzea. Hori da Sanfermines78 Gogoan plataformaren helburua, eta, horregatik, Dora Salazarren eskultura jarriko du, zezen plazaren inguruan. Orduko uztailaren 8an poliziak eraildako German Rodriguezen erailketa oroitzeko oroitarri txiki bat existitzen da egun, baina, Rodriguez gogoratzeaz gain, zauritutako guztiak omendu nahi dituzte -tiroz zauritutako 11 lagun egon ziren-.
Udalaren baimena badute, eta, orain, crowdfundinga eginen dute, eskultura finantzatzeko. Bi metroko altuera izanen du eta brontzez eginda egonen da. Barruan, "memoriaren kutxa" sartuko dute, finantzatu duten pertsona guztien izenarekin.
"Gorputz totemikoa" izanen da eskultura, ez bururik ez besorik ez duena, "baina mingarria izan gabe", Salazar egilearen hitzetan. "Oroitzeko espazioa izanen da, ez oroitzekoa soilik, baizik eta, gerora begira, erasoei stop esanen diena".
"Zentzurik gabeko eraso hori eta kolpatutako hiriak jasandako mina adieraziko du eskulturak. Zezen plazan zeuden 20.000 lagunetako edozein izan zitekeen German", esan du Helena Bengoetxeak Sanfermines 78 Gogoan plataformaren izenean.
