Presoen eskubideen aldeko Bilboko manifestazioa mintzagai izan dute Nafarroako Parlamentuko taldeek."Preso guztien" dispertsioarekin amaitu behar dela ziurtatu du Geroa Baik, "ez bakarrik euskal presoen sakabanaketarekin"; ETA "disolbatzea" ezinbestekotzat jo du Koldo Martinez bozeramaileak. Horrez gainera, Nafarroak kartzela kudeatzeko eskumena berreskuratu behar duelakoan dago taldea.
Bestalde, "dispertsioarekin amaitzeko ordua" dela nabarmendu du EH Bilduko parlamentari Adolfo Araizek, "gobernuak ez baitira mugitzen kanpotik jendeak bultzatzen ez baditu". Horregatik, Frantziako estatuan emandako pausoekin oroitu da, eta hegoaldean ere mugimenduak izateko garaia dela azpimarratu du.
Laukoa osatzen dutenen artean Ahal Duguk ere "salbuespen neurriak" amaitzeko unea dela azpimarratu du, giza eskubideak urratzen ari direlako.
Oposizioa, tinko
"Biktimekin konprometituta" dago UPN, hori du "lehen konpromisoa", eta hori da, hain justu, erantzun duena Javier Esparza eledunak presoen eskubideei buruz galdetuta. "ETAk egin behar duena da disolbatzea, desagertzea eta argitu gabe dauden hilketak argitu", adierazi du Esparzak; PPk ere hari berari eutsi dio eta lehena "desarmatzea" dela ziurtatu du. ETA disolbatu dadin eskatu dute biek.
PSNk presoek "urrats legal zenbait" egin dituztela uste du eta, orain, gerturatze kasuak "banan-banan" aztertu beharko direla.
