Hainbat eskolatan jardunaldi jarraia ezarri zenez geroztik, jantokietako langileen baldintzek okerrera egin dute: lanaldi murrizketak eta soldata jaitsierak jasan dituzte, ordu erdi gutxiago lan egiten dute egunean -eta hori ordutegi murritzak dauzkan sektore batean asko da- kaleratzeak izan dira… Horregatik, elkarretaratzea egin du LABek gaur goizean, Hezkuntza Departamentuaren aurrean, eta 200 lagun inguru batu dira.
Auzia ez da jardunaldi jarraiaren kontra daudenik, baizik eta ezartzeko era ez dela "egokia" izan eta ez dituela "aintzat hartu" ez jantokietan otordu duinak emateko beharrezkoak diren erritmoak ezta langileen eskubideak ere, LAB sindikatuko kide Itziar Lukanbiok salatu duenez.
Prekarizatutako eta feminizatutako lana
Prekarizatutako eta feminizatutako lana da jantokiko langileena, %95a emakumeak dira; 1.500 langile baino gehiago, Nafarroa osoan. Gaur, Hezkuntza Departamentuari exijitu diote "neurriak hartzeko", jantokiak ere hezkuntzaren parte baitira, janaria banatzeaz gain, “ohitura osasuntsuetan eta elkarbizitzan” hezitzen dituztelako umeak. Langileen aburuz, 45 minutuko txandak ezarrita haurrek bazkal dezaten, "ezinezkoa" da kalitatea eta hezkuntza bermatzea.
