Iruñerriko euskaldunon agerkaria
euskalerriairratia.eus

Zerrenda bakarraren aldeko elkarretaratzea egin du LABek Ezkerraren egoitzaren aurrean

Euskalerria Irratia 2017-12-07 08:04   Gizartea  Nafarroa

Bi egunean bi azterketa jartzeko PSNk aurkeztutako lege proposamena babestu du lauko gobernuaren parte den Ezkerrak. Bi zerrendek aukera berdintasunak bermatzen ez dutela salatu du LABek.

Zerrenda bakarraren aldeko elkarretaratzea egin du LABek Ezkerraren egoitzaren aurrean
Argazkia: LAB sindikatuak zerrenda bakarraren alde Ezkerraren egoitza aurrean egindako elkarretaratzea. / @LABnafarroa | Ikusi handiago | Argazki originala

"Erregimenaren indarrek" Nafarroako Gobernuaren "iniziatiba" mugatu nahi dutela kritikatu du sindikatuak, eta ez da harritu "aldaketaren kontrako indarrak era horretan erreakzionatu izanaz", bai, ordea, Ezkerraren kasuarekin: "Askoz gehiago harritzekoa da Ezkerrak zerrenda bakarraren kontra horrela jotzea, ulertu beharrean neurri eraginkorra eta diskriminazioaren kontrakoa dela, gainera Espainiako estatu osoan Nafarroan baino ez dira langileak hizkuntzaren arabera banatzen".

LABen aburuz, "garaiz da oraindik erregimenaren indarrek eta Ezkerrak parlamentuan lor ez dezaten, eskolan, kalean eta Administrazioan lortu ez dutena".

"Nafarroan, XXI. mendean, alderdi batzuk prest daude pertsona elebidunak eta hirueledunak bereizteko, historikoki jendea erlijio, arraza, gizarte edo genero arrazoiak erabiliz diskriminatu izan den bezala", kritikatu du LABek. 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa