Urriaren 12an Herri Indigenen eta Kultur Aniztasunaren Eguna aldarrikatuko du Nafarroako Parlamentuak. Adierazpena aurkeztu dute gobernua sostegatzen duten taldeek eta aurrera egin du.
Gainera, bihar, urriaren 11n, ekitaldi ofiziala izanen da, eledunen mahaian irailaren 25ean hala erabakita. Besteak beste, hainbat herritako ordezkarien kultur emanaldiak izanen dira.
UPN Herri Indigenen Egunaren kontra
Asaldatuta hartu du UPNk Herri Indigenen Eguna ospatzeko proposamena eta beste adierazpen bat jarri du mahaiaren gainean: urriaren 12an Hispanitatearen Eguna ospatzeko. Eguna bera jai egun ofiziala den arren, berriz ere gaia erdigunean jarri nahi izan dute erregionalistek. Javier Esparzak adierazi du "espainiar guztien eguna" dela eta Nafarroako Gobernuak "Espainiarekin zerikusia duen oro" ezabatu nahi duela.
