Fiteroko Udalak adierazpen baten bidez “guztiz tamalgarritzat” jo ditu joan den astean herrian izandako erasoak. Halaber, nabarmendu du Fiteron erlijio eta kultura ezberdinetako pertsonen arteko elkarbizitza “baketsua” dela.
Joan den asteazkenean, Guardia Zibilak 18 eta 55 urteko bi gizon atxilotu zituen, hiru adingabe marokoar jo zituztelakoan.
Udalak nabarmendu du Tuterako epaileak lesio delitua egotzi diela atxilotuei, ez ordea gorroto delitua: “hartara, bazterrean utzi zuen erasook arrazoi ideologiko edo erlijiosoekin lotzeko aukera”.
Udalak, bestalde, tamalgarritzat jo du bai herrian gertaturikoak, baita horrek eduki duen oihartzun mediatikoa ere. “Oso aspaldidanik, erlijio eta kultura ezberdinetako komunitateetako pertsonak harmonia eta bake giroan bizi dira Fiteron, batere arazorik izan gabe, eta ziur gara aurrerantzean ere hala izanen dela, gure herria guztiekin tolerantea baita, guztiekiko errespetua baitu”, irakur daiteke agirian.
Bestalde, erasoa pairatu zuten hiru adingabe marokoarretako baten aitak ere ukatu du gertaturikoaren gibelean islamofobia dagoela: “Hemen sekula ez dugu elkarbizitza arazorik eduki, sekula ez dugu gorrotorik pairatu. Hemen denok, erlijio batekoak eta bestekoak anai-arrebak bezala bizi gara.