Corellako ikastetxe publikoko klaustroak bi gauza eskatu dizkio Nafarroako Gobernuari: batetik, Jose Luis Arrese izena kendu eta Corellako Hiria jartzea; bestetik, ikastetxearen helbide ofiziala Yerga kaleko sarrerakoa izan dadila, eta ez Jose Luis Arrese kalekoa.
Jose Luis Arrese Francoren Mugimendu eta Etxebizitza ministroa izan zen, baita Falangearen sortzaileetako bat ere. Frankismoaren hastapenetako ideologo nagusietako bat izan zen. Bilbon jaio zen, 1905ean, eta Corellan hil, 1986an.
Urtetan, Corellan futbol zelaiak, ikastetxe publikoak eta kale batek haren izena izan dute. Aurki, hiruotako bakar batek ez du izanen. Futbol zelaiari duela urte batzuk aldatu zioten deitura. Nafarroako Gobernuak hilabete honetan onartu du ikastetxearen birbataiatzea. Eta Corellako Udalak gaur bertan aztertuko du kalearen izen aldaketa.
Ez pentsa Arreseren omenezko nomenklaturak horren aspaldikoak zirenik. UPNko alkateak 2005ean jarri zion haren izena futbol zelaiari. Eta ikastetxe publikoa 1976an eraiki zuten.