Nafarroa 'Euskal Y'rekin lotzeko bi aukera jarri dituzte mahai gainean. Espainiako Gobernuak, Nafarroakoak eta Jaurlaritzak aztertzen jarraituko dute Nafarroa 'Euskal Y'rekin nola lotu, izan ere, bi aukera posible ikusten dituzte: alde batetik, Iruñea eta Gasteiz zuzenean lotzea edo beste alde batetik, Ezkiotik bideratzea.
Bataren eta bestearen artean desberdintasun ugari daude. Alde batetik zein herri eta zein inguru zeharkatuko lituzkeen, eta bestetik, ekonomikoa. Hain zuzen ere, Gipuzkoatik egiteko 1.670 milioi euroko kostua izanen luke, hori BEZa kontuan hartu gabe, eta modu horretan Aralar mendizerra saihestu egin beharko luke.Beste aukera, zuzenean Arabako hiriburura doana litzateke, merkeagoa izanen litzatekeena, 720 milioi euro inguru hain zuzen ere.
Sustapen ministroak, Iñigo de la Sernak esan du 2017ko amaiera arte ez direla loturaren lanak hasiko, orduan jakinen baitu Espainiako Gobernuak mahai gainean dauden bi proiektuen bideragarritasuna zein den. Izan ere, De la Serna ministroak esan du bileraren "helburua akordio batera iristea" bazen ere, bi aukerak "bizirik" uztea erabaki dutela, bien bideragarritasun txostenak egiteko eta onena zein den ikusteko.
