LGTBIQ+ komunitatearen nazioarteko egunarekin bat egin du Iruñeko Udalak, eta "sexu orientazio zein genero identitatea dela-eta eskubide berdintasunaren eta diskriminazio ezaren instituzio eredugarria" izateko konpromisoa adierazi du, eta "horretarako, diskriminazio egoerei aurre egiteko beharrezko ekintzak garatuko ditu". Horietako bat: zebrabide bat ortzadarraren kolorez margotzea, LGTBIQ+ komunitatearen banderaren koloreekin, alegia. Horrez gainera, leku ikusgarri batean jarriko du bandera, ekainaren 28an.
Era berean, erasoren bat jasan duten pertsona guztiekin "elkartasuna" adierazi du eta "benetako berdintasun erreal eta eraginkorraren aurka doazen ekintza sozial eta politiko guztiak" gaitzetsi.
Nafarroako Gobernuari ere erreferentzia egin dio udalak, LGTBI+ legea garatzeko baliabideak eman ditzan exijitu du, deklarazio instituzionalaren azken puntuan.
