Iruñeko Udaltzaingoaren komisaldegiaren kalabozoetan gertatzen dena grabatuta geratuko da hemendik aurrera. Donibaneko eraikinaren beheko partean dauden hamahiru ziegetan -banakako hamabi eta taldeko bat- segurtasun kamerak ipiniko dituzte, eta 24 orduz grabatuko dute gertatutakoa. Hala egiteko agintzen du Europako araudiak eta giza eskubideei dagokien legediak. Atxilotutakoei emandako tratua zein den aztertu ahal izanen da hemendik aurrera, kalabozoek puntu itsua izateari utziok diote.
Herritarren harrera gelan, moldaketak
Gela berera sartzen ziren orain arte eraso, lapurketa edota genero indarkeria salatu behar zutenek eta delituren bat egotzita komisaldegian zeudenak, etilometria probak egin behar zituztenak zein Gizarte Ekintza eta Babes Unitateari laguntza eskatzen ziotenak.
Orain, biktimak beste ate batetik sartuko dira, esaterako erasotzaileekin gurutzatzea ekidinez. Adin gabekoentzat berariazko sarrera prestatu dute, beren intimitaterako eskubidea ahalik eta gehien bermatzeko.
