Osasunbidean behin behinekotasuna langileen artean gehiegizkoa dela salatzeko kalera atera dira langileak. ELA sindikatuko Ainhoa Fernandezen arabera, behin behinean daude profesionalen %40 eta hori, osasun publikoa kalitatezkoa izateko oso urrun gelditzen da.
Langile horien egunerokotasunean eragina du, ez-jakintasunean bizi direlako. Eta, Osasunbideko erabiltzaileentzat ere ez da egokia profesionalak behin eta berriz aldatzen ibiltzea.
Behin behinekotasuna %6ra jaitsi beharko litzatekeela uste du Fernandezek. Baina horretarako, lan eskaintza errealista egin beharko luke Gobernuak, eta ez, joan den astean egin zuen proposamena: "215 plazarekin ez da arazoa konponduko".
"Gobernuak ezin du segitu ETT batek bezala funtzionatzen. Osasun publikoak kalitate handiagoa behar du eta baita, bertan lanean aritzen diren langileek ere".