Ebakuazio galeriak eraikiko dituzte 2018rako Belate eta Almandozko tuneletan, Europako Segurtasun Arautegiari men egin asmoz. "Epe motzeko konponbidea" baino ez da Ana Ollo Nafarroako Gobernuko bozeramailearen hitzetan, ez baitu arazo bere osotasunean konponduko. Bada zerbait, ordea.
Nolanahi ere, egungo aurrekontuei begira, ez dirudi bi urte barru guztiz bukatuta egonen liratekeenik obrak; 2019ra atzeratu daitezkeela ere adierazi du exekutiboak.
20 eta 30 milioi euro arteko aurrekontua beharko dute lanek. Larrialdi kasuetan erabili ahalko liratekeen bideak dira eginen dituztenak, esaterako, anbulantziak edota istripuak artatzeko ibilgailuak pasatzeko.
Konponbide osoa
Tunelak bitan banatzea litzateke "konponbide osoa", baina horrek 200 milioi euroko kostua izanen luke, eta, beraz, "oso garestia" da horri aurre egitea, gobernuaren aburuz.
