Torturaren aurkako muralaren aurrean egin dute agerraldia Aztnugal kanpainako kide andanek. "Espainian torturatzen da". Aho bizarrik gabe hartu du hitza Xabier Beortegik.
Europako Giza Eskubideen epaitegiak Espainia zigortu du haren tortura salaketak ez ikertzeagatik. 2011n hartu zuten atxilo eta tratu txarrak sufritu zituela esan arren, epaileek iskin egin zioten kasua ikertzeari.
"Zer gehiago gertatu behar da Guardia Zibilak torturatu gintuela onar dezaten? Zenbat epai behar ditugu egindakoaren erantzukizuna onartzeko?". Beortegirenak dira galdera erretorikoak. Harena da salaketa.
Prentsaurrekoan, "tortura kasu guztiak" aztertzeko eskatu dute, ikusitakoak ikusita. Are gehiago, Nafarroan ikerketa bat egin dadin galdegin dute, tortura zenbat pertsonek pairatu duten argitze bidean. Halaber, herritarrei dei egin diete, tortura salatzen segi dezaten. Azkenik, Carmen Alba Espainiako Gobernuko ordezkariaren dimisioaren alde azaldu dira.