Osasungintza publikoak hartuko ditu bere gain OPUSeko langileak, gainontzeko herritar guztiak bezalaxe. Hori da Nafarroako Gobernuak adostu duena, eta ez kalapita gutxirekin. Haatik, erabakita dago jada, eta maiatzaren 1ean jarriko dute indarrean.
Badira zenbait "balizko salbuespen", dena dela. Prozesu onkologiko bat bizitzen ari direnak klinikan geratu ahalko dira, baldin eta bertan hasi badute tratamendua. Prozesu kirurgikoren bat bertan egitekoa dutenek ere egin dezakete hor, gehiago ez atzeratzeko, beti ere, maiatzaren 31 baino lehen.
Bestalde, Nafarroako Unibertsitate Klinikarekin hasi dutenak haurdunaldiari dagozkion zaintza guztiak zentroan jarraitu ahalko dute, erditu arte. Emaitzen zain dauden pazienteak ere joan daitezke klinikara, baina maiatzaren 31 iritsi aurretik jaso beharko dituzte haien frogak.
Medikazioa jarraiki behar dutenak ere OPUSeko klinikan egonen dira, publikora bidali arte. Azkenik, errehabilitazio tratamendua jasotzen ari diren gaixoek ere jarraitu ahalko dute errekuperazioa hasi duten toki berean.