Oinezkoaren aldeko apustua egin nahi dute Iruñeko Udalak eta mankomunitateak. 2017ra begira ari dira. Hemendik urtebetera billabesak Alde Zaharrera gerturatzea dute xede. Formula: Armadaren etorbideraino iristen diren autobusak Sarasate pasealekuan geratzea.
Iruñeko erdigunea oinezkoentzat egokitzeko planaren parte da neurria. "Mugikortasun jasangarria sustatzea". Horra udalbatzaren helburua.
Horretarako, billabesen ibilbideak aldatzeaz ez ezik, autoen joan-etorria geldiarazi eta oinezkoak jarriko dituzte erdigunean. Halaber, Alde Zaharra eta Zabalgunea batuko dituen korrika egiteko "gune berdea" zabaldu nahi dute, Takonera, Gaztelu gibela eta Ziudadela elkartuz.