Enpresak dio "etorkizuna ziurtatzeko" proposatu duela 250 lagun kaleratzea. Markalainek eta Larreak, haatik, aitzakiatzat hartu dute argudioa. "Enpresak nahi duen 'egia' da hori, baina guretzat ez da egia".
"Langileen aurka" aritzea leporatu diote TRWri, halaber, eta azpijokotan dabilela argi eta garbi sumatu dute. "Nahiz eta etsai handia izan, gu, langileak, asko gara".
Nafarroako Gobernua, alde
Nafarroako Parlamentuko osoko bilkuran izan ziren atzo TRWko langile batzordeko ordezkariak. Manu Aierdi presidenteordeak etorkizun beltzari argia eman zion: "Volkswagenek aurreikusia duen auto berriko pieza TRWk egiteko aukera bada". Zirrikitu berri bat ireki du, beraz, exekutiboak.
"Harrera ona" egin diete gobernuko kideek, Markalainek eta Larreak esan dutenez, eta Ayerdik botatako proposamenari erantzuna eman diote: "Inportantea da Volkswagen inplikatzea".
Hitzarmena helburu
"Derrigortu gabe lan hitzarmen bat egitea". Horra langile batzordearen helburua, gurean jakinarazi dutenez. "Enplegua lehenbiziko lerroan jarri nahi dugu, negoziatu nahi dugu, irtenbideak ditugu, baina irtenbideak izateko produktuak behar ditugu. Jarri produktuak mahai gainean eta orduan hitz egingo dugu"