20 urteko ibilbidea eginen du Gogoa Foroak biharko egunarekin batera. Urteotan, Kristautasuna eta Egungo Munduaren inguruan hausnartzea izan dute erronka. Gauzak horrela, 191 ekitalditan 201 adituren hitzaldi zein jardunaldiak eta 70.000 lagunen parte hartzea izan dituzte.
1996an jaio zen "zerbitzu xume" izateko xedearekin. 20 urtez jardunean aritu da Gogoa Foroa "elkarte kristauen laguntzaren, sostenguaren eta lanaren bidez". Orain arte bezala egun ere "elkargunea" izan nahi dute "politikaz, ekonomiaz, gizarte eragileez, komunikazioaz, erlijioaz eta Elizaz" hitz egiteko. Hausnarketa egiteko eta ideiak partekatzeko aukera ere lortu nahi dute: "Esperientziak, ideiak eta ahots desberdinak konpartitu ahal izateko gune gara".