Aldaketa iritsiko al da gaur? Galdera horri erantzuten ahaleginduko gara 20:00etatik aurrera Euskalerria Irratian. Ordu horretan, irrati saio berezia hasiko dugu. Mikel Bujanda izanen da gidaria, eta alboan, estudioan izanen ditu Patxi Zabaleta politikari ohi eta abokatua; Fermin Erbiti kazetaria; eta Carlos Vilches Nafarroako Soziologoen Elkargoko dekanoa. Telefonoz, beste zenbait analistarekin mintzatuko gara. Besteak beste, Berria-ko kazetari Joxerra Senar eta Diario de Noticias-eko Ibai Fernandezekin. Erredakzioan, hiru kazetari izanen ditugu datuak biltzen eta antenan zabaltzen. Alderdien egoitzetan, beste lau kazetari izanen ditugu, erreakzioak jasotzen
Bihar, mahai ingurua
Bestalde, bihar goizean, Metropoli Forala saioan, 8:30etik aurrera, EH Bildu, Izquierda Ezkerra, Geroa Bai eta Podemos-Ahal Duguko eledunak elkarrizketatuko ditugu. 10:00etan, mahai ingurua eginen dugu Aingeru Epaltza, Floren Aoiz eta David Garnatxorekin. Saioak biribilak izan daitezen falta den bakarra, emaitza egokiak izatea.
Webgunean, hainbat analisi
Webgunean, datuen zuzeneko segimendua egiteaz gain, hiru kazetariren analisiak zabalduko ditugu gaur gauean bertan: Mikel Lizaso, Asier Azpilikueta eta Aritz Ibañezenak, hain zuzen ere. Astelehen goizean, beste hainbat analisi sareratuko ditugu: Santi Leone, Angel Erro, Aitor Etxarte, Aingeru Epaltza, Fernando Mendiola...
