Hautesle zerrendetatik at utzi dituzte milaka eta milaka herritar. Ezinen dute botorik eman, ezta jaso ere. Hori salatzeko, Paperak denontzat plataformak elkarretaratzea egin du gaur Hauteskunde Batzordearen aitzinean, eta egoera salatzen duen idazkia helarazi die batzordekideei.
Plataformaren kalkuluen arabera, 40.000tik gora dira atzerritar baztertuak, Nafarroan bizi, lan egin eta zergak ordaindu arren bozkatzerik eta bozkatuak izaterik izanen ez dutenak. Badira beste 20.000 atzerritar Europar Batasuneko herritarrak izanda bozkatzerik badutenak, ez ordea bozkatuak izaterik.
Paperak denontzat plataformaren prentsa oharraren arabera, “ezinbestekoa da hemen bizi diren pertsona guztien eskubide zibil eta politikoak aitortzea, soilik horrela baita posible gizartea egiazko parekotasunean oinarritzea”.
