Eskuin espainiazaleek Nafarroan sinatutako ituna "interesgarria" eta "zentzuduna" dela esan du Alfonso Alonso Araba, Bizkai eta Gipuzkoako PPko presidenteak. Gauza bera egin nahiko luke Ciudadanosekin Hegoaldeko gainerako probintzietan. Helburua argi dute han eta hemen: ez dute boto bat bera ere alferrik galdu nahi.
Bien bitartean, Nafarroako aldaketaren indarrak trikornioaren itunaz ari dira etengabe: Nafarroa saldu dutela, foruek piperrik ez dietela axola... Baina inork ez dio erantzuten inporta duen galderari: Zer eginen duzue orain? Zer estrategia duzue legegintzaldia errepikatu ahal izateko? Izan ere, boto parrasta alferrik galdu litezke.
Bitxia bada ere, eskuin espainiazaleak euskal lurraldetasuna onartu du, zeharka bada ere. Espainian onargarria ez den ituna, zoragarria baita Hego Euskal Herrian. Paradoxikoa. Aldaketakoak mirari baten esperoan, eta espainiazaleek euskal ituna.
