Beste behin ere Ana Beltranek eman du zer esanik. Beste behin ere, Nafarroako euskaldun guziok iraindu gaitu. Soziolinguistika Klusterreko kideei oldartu zaie, mespretxuz hitz egin die, eta Iruñean euskara ofiziala ez denez gero, ez erabiltzeko exijitu die. Gaztelera inposatu nahi izan du, alegia. Gero, gu guzion aurka egin du, esanez euskara ez dela erabiltzen ez eremu mistoan ezta hegoaldean ere, milaka nafarren existentzia ukatuz. Larria da, oso.
Hala ere, eman dit zer pentsa. Parlamentuan nekez aditu genezake hitzartzerik euskara hutsez. Berehalaxe gogoratu naiz Aitziber Sarasolarekin. Hark ez zuen hitzik egin gazteleraz, behin ere ez parlamentuko mikrofonoen aurrean. Euskara ez da ofiziala, baina bere erabilera normalizatzeko erabaki koherente eta garrantzitsua da hori. Eta parlamentari euskaldunek euskaraz baizik ez balute eginen? Hori da Beltranen gisakoei eman diezaiekegun erantzunik sendoena: euskaraz mintzatzea.
