Emakume ilustratzaile asko gara Euskal Herrian. Eta pozgarria iruditzen zitzaidan Joanna Russen «Nola ezabatu emakumeen idazketa» irakurri nuen arte.
Russek liburuan historian zehar emakume idazleak ezerezteko erabili diren estrategiak azaltzen ditu. Artearen hierarkiak bistaratzen ditu baita ere. Eskalaren goiko puntan Arte Ederrak leudeke. Honek esan nahi du Arte Handia, gizonezkoena, mendebaldekoa. Beheko aldean berriz, dekorazio-arteak: txikiak, emakumezkoenak, periferiakoak.
Guzti hau irakurtzean pentsatu nuen, agian, ilustrazioa feminizatutako lanbidea dela arte txikien espaloi baxuenetan kokatuta dagoelako. Bai, badu nolabaiteko kutsu erromantikoa, Instagramen margoak eta pintzelak jarrita like asko lortzen dituzu, baina zaila da ilustrazio ibilbide luze bat egin nahi eta bizirautea.
