Zalantzaren aldeko manifestua idaztea ez litzateke lan erraza. Hizkuntzaren ohitura eta mugak ezbaian jartzetik abia gintezke agian, eta segidan norberaren egiak abandonatzen saiatu. Dena litzateke behin-behineko, dena dudagarri.
Unibertsalen fan direnen aurkako erasoa izan liteke hurrengo urratsa: “aizue, ez al zarete konturatzen orokorra deritzozuen azalpena espezifiko xamarra dela?”. Edukazio oneko erasoa beti ere, noski.
Bigarren oldarraldia biolentoago amestea, aldiz, ez da zaila: “aizue, egi unibertsalaren intelektual absolutistak, ez al zaizue iruditzen dominazioaren mania uniformea zuen begirada partzialetik jaiotzen dela?
Behar izatekotan, larrialdi kasuetan bakarrik, hirugarren argudioak irainaren forma har lezake.
Amaitzeko, manifestua etxepeko lokutorioan inprimatu eta hozkailura lotu genezake iman bikote batekin. Goizero irakurtzea ez litzateke ideia txarra, beharbada.
